आयदा-स्नि
7.0 फोजोबनाय (Conclusion):
रावानो जादों सुबुं माहारिया सुंज्रोब लाखिलायनायनि देरसिन बिजों एबा राहा। रावखौ सुबुङा जोनोमजों लोगोसे मोनबोफाया बेखौ समाजाव थानानैसो आरजिना लायो एबा सोलोङो। मोनफा रावखौ सुबुङा गावबा गावनि सोलो, गियान आरो आदबजों समाजनिफ्राय आरजिना लायो एबा सोलोङो आरो रायो। बुहुमनि रावफोरखौ नोजोर होयोब्ला नुगोनदि मोनफ्रोमबो रावावनो रावसाफोर दं। बेनि अनगायैबो खायसे रावसा ओनसोलनि सिङावनो माखासे ओनसोलारि रावसाफोरबो थाबावो। थिक बेबादिनो कुमारिकाटा ओनसोलनि बर’ सुबुंफोरा रायज्लायनाय रावाबो सानजायारि बर’ रावसा (Eastern Boro Dialect Area) नि सिङाव थानाय मोनसे ओनसोलारि रावसा। बे कुमारिकाटा ओनसोलनि रावसाया रिंसारखान्थि (Phonology), महरखान्थि (Morphology), बाथ्राखान्थि (Syntax) आरो सोदोबबाख्रि (Vocabulary) नि बिथिङाव मानगोनां रावजों गोबां फारागथि दं एबा गोरोबलायै दं। गोजौआव होनाय बिदिन्थिफोरानो बेनि रोखा फोरमान। बेनि जाहोना जादों गाहायै समाजारि थासारिनि बायदिसिना जाहोन लोगोसे भुमखौराङारि जाहोन। बे ओनसोलनि बर’ सुबुंफोरनि सोरगिदिं साखाथि-फाखाथि गोबां रावारि सुबुंफोर दं जेरै- असमीया, राभा, नेपाली, हाजं, सावथाल, मुसलमान, राजबंसि बायदि बायदि। बेफोर रावारि सुबुंफोरजों बै ओनसोलनि बर’ सुबुंफोरा सानफ्रोमबो समाजारि सोमोन्दो जालायो। जायनि जाहोनाव बै ओनसोलनि बर’ सुबुंफोरनि राव, हारिमु गासै बिथिङाव बै रावारि सुबुंफोरनि गोहोम आरो अनसायनाय दं। रावनि बिथिङाव गाहायै असमीया रावानो बै ओनसोलनि बर’ सुबुंफोरनियाव बांसिन गोहोम खोख्लैदों आरो गावसोरबो मिथिस्लाबा जासे अनसायना लादों। जायनि थाखाय बिसोरनि रायज्लायनाय रावाव गोबां असमीया सोदोबफोरा बाहायजायो आरो खायसेया असमीया रावजोंनो गथ’फोरखौ फोरोङो। बर’ रावखौ फोगोमसिननो आरो जौगाहोनो थाखाय गासै ओनसोलनि बर’ रावसाफोरखौ बुथुमनो आरो बेनि सायाव फरायसंनाया जोबोर गोनां। रावसाफोरखौ बुथुमनाय आरो फरायसंनाया रावनि जारिमिनारि गुमुर होनो हायो आरो मोनसे रावा जौगानायाव हेफाजाब मोनो।
हेफाजाब लानाय बिजाबफोर:
1. बसुमतारी, राजेन्द्र कुमार : राव बिगियान, सेथि दिहुननाय, फेब्रुवारी, 2002, भजेन चन्द्र
बर’,खराइबारि, दरं।
2.चैनारी, स्वर्ण प्रभा : बर’ रावखान्थि, ब्रैथि दिहुननाय, आगष्ट, 2012, नीलिमा प्रकाशनी, बागानपारा।
3. चैनारी, स्वर्ण प्रभा; बसुमतारी, फुकन चन्द्र: रावनि महर (सेथि खोन्दो), थामथि दिहुननाय,
2016, नीलिमा प्रकाशानी, बागानपारा।
4. बसुमतारी, फुकन चन्द्र : राव बिगियाननि फरा, सेथि दिहुननाय, फेब्रुवारी, 2017,
नीलिमा प्रकाशनी, बागानपारा।
खारिथि होगिरिफोर:
1. जगेन, बर’, बैसो-58, फोरोंगिरि, फुहुराबारि।
2. गजेन सोरगियारी, ,बैसो-27, फोरोंगिरि, फुहुराबारि।
3. सबिन बर’, बैसो-63, आबादारि, दुब्लिबारि।
4. सानसुमा बर’, बैसो- 23, फरायसा, भेराघाट।
5. माधब बसुमतारी, बैसो-26, फालांगिरि, फाख्रिबारि।
6. जोंसार बर’, बैसो-25, आबादारि, पानबारि।
सुंद’ महर आरो नेरसोन
1. मा:गो:रा: – मानगोनां राव।
2. कु:ओ:रा: – कुमारिकाटा ओनसोलनि रावसा।
3. /-/ – रिंसारथि नेरसोन।
4. – – दाजाबदा नेरसोन।
5. गा.गै. – गारां गैयै।
6. गा.गो. – गारां गोनां।
✪ संजिर हाबानि गासैबो लिरबिदांखौ नायनोब्ला बेयाव थु
✪ नसिम थांनोब्ला बेयाव थु