आयदा-बा
5.0 बाथ्राखान्थि (Syntax):
बाथ्राखान्थिया जादों बाथ्रानि दाथायखौ राव बिगियानारि खान्थिजों बिजिरनायनि मोनसे खान्थि। मोनफा बाथ्रायाव सोदोबफोरा माबोरै फारियै सुजुजायै आरो गुबुन गुबुन रावखान्थियारि थादेरसाफोरा माबोरै गावजों गाव सोमोन्दो लाखिना बाहायजायो बेफोर गासैखौबो बाथ्राखान्थियाव सावरायो। राव बिगियानि Richard नि बादिब्ला बाथ्राखान्थिया जादों- ‘‘The study of how words combine to form sentences and the rules which govern the formation of sentence.’’
5.1 दाथायखौ लानानै बाथ्रानि बाहागो:
दाथायारि बिथिंनिफ्राय बर’ रावनि बाथ्राखौ मोनथाम बाहागोआव बोखावनानै सावरायनो हायो। बेफोर जाबाय-
क) गोरलै बाथ्रा (Simple sentence)
ख) गलाय बाथ्रा (Complex sentence)
ग) जथाइ बाथ्रा (Conpound sentence)
नोजोर होयोब्ला बे मोनथामबो बाहागोनि बाथ्रायावनो मानगोनां राव आरो कुमारिकाटा ओनसोलनि रावसानि गजेराव फारागथि नुनो मोनो। जेरै-
क) गोरलै बाथ्रा (Simple Sentence):
गोरलै बाथ्राया जाफुंजा बाथ्राजों दाजायो आरो सानस्रिया मोनसे बुंथियावनो जोबो। गोरलै बाथ्रायाव मोननै बाथ्रा खोन्दो थायो। बेफोर थांखि (Subject) आरो थाखाय (Predicate)। बर’ रावनि गोरलै बाथ्रानि दाथाया सरासनस्रायै S-O-V (मावग्रा -मावजाग्रा- थाइजा) जायो। गोरलै बाथ्रानि बिथिङाव मानगोनां राव आरो कुमारिकाटा ओनसोलनि रावसानि गेजेराव इसे जुदाथि नुनो मोनो। जेरै-
मा:गो:रा: कु:ओ:रा:
क) आं बिजाब फरायो।
ख) रामा मोसादों।
ग) जों दैसायाव दुगैयो।
घ) बिसोर बल गेलेदों।
ङ) बियो जौ लोंदों।
च) सिताया मेथाइ रोजाबदों
छ) आदाया हाल एवदों।
ज) आइया सि सुदों। क) आं खिथाब फरायो।
ख) रामा मोसादो।
ग) जों दंगआव दुगैयो।
घ) इसोर बल गेलेदो।
ङ) इयो जखाय लोंदो।
च) सिताया गान खनदो।
छ) आदाया हाल एवदो।
ज) आइया हि सुदो।
ख) गलाय बाथ्रा (Complex Sentence):
सरासनस्रायै गलाय बाथ्रायाव मोननै बाथ्रा खोलोब थानो नांगौ। बेनिनो मोनसेया गुबै एबा गाहाय (Principal or independent) आरो गुबुन मोनसेया लेङाइ (Sub-ordinate) बाथ्रा खोलोब। गलाय बाथ्रानि बिथिङाव मानगोनां राव आरो कुमारिकाटा ओनसोलनि रावसानि गेजेराव इसे फरागथि नुनो मोनो। जेरै-
मा:गो:रा: कु:ओ:रा:
क) बि फैयाब्ला आं थाङा।
ख) नों मदद होआब्ला आं बेखौ मावनो हालिया।
ग) बियो मा मावदों आं मिथिगौ।
घ) बिसोर बबाव दं आं बेखौ मिनथिगौ।
ङ) बे बाथ्रानि सोमोन्दै आं जेबो मिनथिया। क) इ फायाब्ला आं थाङा।
ख) नों खहाय खामाबा आं इखो मावनो हाला।
ग) इयो मा मावदो आं मिथिगो।
घ) इसोर मुवा दोङो आं इखो मिथिगो।
ङ) इ बाथ्रानि बिखय आं एख’ मिथिया।
ग) जथाइ बाथ्रा (Compound Sentence):
मोननै एबा बेनिख्रुइ बांसिन गोरलै एबा गलाय बाथ्रानि जथायानो जादों जथाइ बाथ्रा। बेवहाय मोनसेनिख्रुइ बांसिन गोरलै एबा गलाय बाथ्राफोरखौ दाजाब महरथिनि गेजेरजों सरजाबनाय जायो, थामहिनबा मोनसेनिख्रुइ बांसिन गोरलै एबा गलाय बाथ्राखौ महरथिनि गेजेरजों दाजाबनानै दानाय बाथ्रायानो जथाइ बाथ्रा। जथाइ बाथ्रानि बिथिङाव मानगोनां राव आरो कुमारिकाटा ओनसोलनि रावसानि गेजेराव नुनो मोननाय फारागथिखौ गाहायाव होनाय जाबाय-
मा:गो:रा: कु:ओ:रा:
क) रामनाव गोबां रां रुफा दङमोन नाथाय बियो बाहायनो रोङाखिसै।
ख) आं हाथाइसिम थांदोंमोन आरो बिबो हाथाइसिम फैदोंमोन।
ग) बियो जोंहानिसिम फैदोंमोन आरो आंखौ लांफानो नागिरदोंमोन नाथाय आं थाङाखिसै। क) रामनाव माखासेमानि थाखा फैसा दोङोमोन किन्थु इयो बेबहार खालामनो रोङासै।
ख) आं हाथायालागै थांदोमोन आरो इबो हाथायालागै फायदोमोन।
ग) इयो जोंनियालागै फायदोमोन आरो आंखो लांफानो नायदोमोन किन्थु आं थाङासै।
मुंख’जाथावदि मानगोनां रावाव जथाइ बाथ्रा दानो थाखाय बाहायनाय दाजाब महरथि ‘नाथाय’ नि जायगायाव कुमारिकाटा ओनसोलनि रावसायाव ‘किन्थु’ दाजाब महरथि बाहायनाय जायो।
5.2 सोदोबथि लाना बाथ्रानि बाहागो:
सोदोबथि लानानै बर’ रावनि बाथ्राखौ मोनबा बाहागोआव बोखावनानै सावरायनो हायो। बेफोर जाबाय-
क) फोरमायनाय दिन्थिग्रा बाथ्रा (Assertive Sentence)
ख) सोंनाय दिन्थिग्रा बाथ्रा (Interrogative Sentence)
ग) थिननाय, बिथोन, खावलायनाय दिन्थिग्रा बाथ्रा (Imperative Sentence)
घ) लुबैनाय एबा हास्थायनाय दिन्थिग्रा बाथ्रा (Optative Sentence)
ङ) सानबोलाउरि दिन्थिग्रा बाथ्रा (Exclamatory Sentence)
क) फोरमायनाय दिन्थिग्रा बाथ्रा (Assertive Sentence):
बे रोखोमनि बाथ्राजों माबा मोनसे जाथाय फोरमायनाय दिन्थियो। बे फोरमायनाय दिन्थिग्रा बाथ्रानि बिथिङावबो मानगोनां राव आरो कुमारिकाटा ओनसोलनि रावसानि गेजेराव इसे जुदाथि नुनो मोनो। जेरै-
मा:गो:रा: कु:ओ:रा:
क) आं बिखौ मिनथियो।
ख) रामा सासे मोजां गथ’। क) आं इखो मिथियो।
ख) रामा खासे गाहाम गथ’।
ख) सोंनाय दिन्थिग्रा बाथ्रा (Interrogative Sentence):
जाय बाथ्रायाव सोंलु सोंनाय फोरमायो, बेनो सोंनाय दिन्थिग्रा बाथ्रा। बे सोंनाय दिन्थिग्रा बाथ्रानि बिथिङावबो मानगोनां राव आरो कुमारिकाटा ओनसोलनि रावसानि गेजेराव इसे फाराग थानायखौ नुनो मोनो। जेरै-
मा:गो:रा: कु:ओ:रा:
क) नोंसोरनि आनजादा माब्ला?
ख) नोंनि फंबाया बबाव थायो? क) नोंसोरनि फरिखाया मब्ला?
ख) नोंनि बिफंआ मुवा थायो?
ग) थिननाय, बिथोन, खावलायनाय दिन्थिग्रा बाथ्रा (Imperative Sentence):
जाय बाथ्रायाव माबा थिननाय, बिथोन होनाय आरो खावलायनाय बायदि सानस्रि बेरखाङो बेनो थिननाय, बिथोन, खावलायनाय दिन्थिग्रा बाथ्रा। बे बाथ्रानि बिथिङावबो कुमारिकाटा ओनसोलनि रावसायाव मानगोनां रावनिफ्राय इसे जुदाथि नुनो मोनो। जेरै-
मा:गो:रा: कु:ओ:रा:
क)बेखौ दामाव।
ख) अननानै नोंनि बिजाबखौ हर। क) इखो दामाव।
ख) अननानै नोंनि खिथाबखो हर।
घ) लुबैनाय एबा हास्थायनाय दिन्थिग्रा बाथ्रा (Optative Sentence):
जाय बाथ्रानि गेजेरजों लुबैनाय, आरज गाबनाय, बोर सारस्रिनाय बायदिखौ फोरमायो बेनो लुबैनाय एबा हास्थायनाय दिन्थिग्रा बाथ्रा। बे बाथ्रानि बिथिङावबो मानगोनां राव आरो कुमारिकाटा ओनसोलनि रावसानि गेजेराव इसे फारागथि नुनो मोनो। जेरै-
मा:गो:रा: कु:ओ:रा:
क) गसाया नोंखौ मदद खालामथों।
ख) नोंनि जिवा लावथों।क) गखाया नोंखो खहाय खालामथो।
ख) नोंनि जिवा लावथो।
ङ) सानबोलाउरि दिन्थिग्रा बाथ्रा (Exclamatory Sentence):
जाय बाथ्रायाव गोसोनि दुखु-दाहा, हरखाब रंजानाय, गोमोनाय, थुलुंगा, सानबोलाउरि एबा सान हाबनाय बायदि सानस्रिया बेरखाङो बेनो सानबोलाउरि दिन्थिग्रा बाथ्रा। बे बाथ्रानि बिथिङावबो मानगोनां राव आरो कुमारिकाटा ओनसोलनि रावसानि गेजेराव इसे फाराग थानायखौ नुयो। जेरै-
मा:गो:रा: कु:ओ:रा:
क) हाय, हाय! आंहा गोरोन्थि जाबाय। क) हाय, हाय! आंआ गोरोन्थि जाबाय।