मानगोनां बर’ राव आरो कुमारिकाटा ओनसोलनि रावसा : मोनसे रुजुथायारि सावरायनाय | Mangwnang Boro Rao Arw Kumarikata Wnswlni Raosa

आयदा-ब्रै

4.0 महरखान्थि (Morphology):

‘महरखान्थि’ बे सोदोबनि बिहुङारि ओंथिया जाबाय- रावाव बाहायजानाय महरफोर (morphemes) आरो दाजाबदाफोरनि सावरायनाय। महरखान्थियाव सोदोबनि दाथायारि बिथिं एबा महरखौ बिजिरो। स्वर्ण प्रभा चैनारीनि बादिब्ला- ‘‘महरखान्थिया रिंसारखान्थिनिख्रुइ जौसिन थाखोनि रावनि मोनसे आयदा। बेयाव सोदोबफोरनि गुबुन गुबुन बिथिं जेरै- सोदोबनि दाथाय, बेनि बाहागोफोर, बेनि गुबुन गुबुन महर, गुबुन गुबुन दाजाबदाफोरनि सोमोन्दै सावरायनाय जायो।’’⁴ महरखान्थिनि बिथिङाव कुमारिकाटा ओनसोलनि रावसा आरो मानगोनां रावनि गेजेराव माखासे फारागथि थानायखौ नुनो मोनो। गाहायाव मोननैबो रावनि गेजेराव महरखान्थिनि बिथिङाव थानाय फारागथिखौ दिन्थिनो नाजानाय जाबाय।

4.1 मुंमा (Noun):

मुंमाया सोदोबमा (Parts of speech) नि मोनसे बाहागो। मुंमानि सोमोन्दै महरखान्थियाव सावरायनाय जायो। सरासनस्रायै मुं दिन्थिग्रा सोदोबानो जादों मुंमा। मुंमानि बिथिङाव मानगोनां राव आरो कुमारिकाटानि रावसाजों फारागथि नुनो मोनो। कुमारिकाटा ओनसोलनि रावसा आरो मानगोनां रावनि गेजेराव मुंमानि बिथिङाव थानाय फारागथिखौ आलादा आलादा सोदोब बाहायनायखौनो मख’नो हायो। जेरै-

मा:गो:रा:	कु:ओ:रा:
सि दैखर बिखब मुदुमफुल सुमफ्राम गंगार दुन्दिया फोरला बेदलाव संग्राय बानलु बिजाब नास्राय थांगोन उवाल औवा थोरसि ओंख्रि फुख्रि	हि खुङा सख्ला मैथ्रु सेमफ्रेम/ सुफारि खासि थारा बहल फानसेव दाला फालौ खिथाब सेंना गन्द्राय उराल उवा खांसि मैगं हाखर

गोजौआव होनाय बेफोर मुंमा सोदोबफोरनि अनगायैबो कुमारिकाटा ओनसोलनि रावसायाव मानगोनां रावनिफ्राय फारागथि गोनां गोबां मुंमा सोदोबफोर मोननो हाबावो। बेफोरनिफ्राय रोखा जानो हायोदि बे मोननै रावनि गेजेराव मुंमानि बिथिङाव फारागथि दं।

4.2 मुंराइ (Pronoun):

सरासनस्रायै मुंमा सोदोबनि सोलायै बाहायजानाय सोदोबानो मुंराइ। अब्लाबो मुंराया गावनि माखासे जर’खा आखुथाइफोर दङ। बर’ रावाव मुंराइखौ गासै मोनबा बाहागोआव रान्दों। बेफोर जाबाय-

क) सुबुं दिन्थिग्रा मुंराइ (Personal Pronoun)

ख) थावनि दिन्थिग्रा मुंराइ (Demonstrative Pronoun)

ग) सोंनाय दिन्थिग्रा मुंराइ (Interrogative Pronoun)

घ) थि दिन्थियि मुंराइ (Indenfinite Pronoun)

ङ) गाव दिन्थिग्रा मुंराइ (Reflexive Pronoun)

बे मोनबा बाहागोनि मुंराइनि मादाव गाहायै मोननै (क) सुबुं दिन्थिग्रा मुंराइ आरो (ख) थावनि दिन्थिग्रा मुंराइनि बिथिङाव कुमारिकाटा ओनसोलनि रावसायाव मानगोनां रावनिफ्राय फाराग थानायखौ नुनो मोनो।

क) सुबुं दिन्थिग्रा मुंराइ: कुमारिकाटा ओनसोलनि रावसायाव सुबुं दिन्थिग्रा मुंराइनि बिथिङाव गिबि सुबुंसाइ (1^st Person) आरो नैथि सुबुंसाइ (2^nd Person) नि महराव मानगोनां रावनिफ्राय मोनबो फारागथि नुनो मोना। नाथाय थामथि सुबुंसाइ (3^rd Person) नि से सानराइ आरो बां सानराइ मोननैयावबो फाराग मोननो हायो। जेरै-

मा:गो:रा:	कु:ओ:रा:
बि/ बियो (बियो बिजाब फरायदों) बिसोर (बिसोर बल गेलेयो)	इ/ इयो (इयो खिथाब फरायदो) इ-सोर (इसोर बल गेलेयो)

मोनसे मख’बावनो गोनां बाथ्राया जादों कुमारिकाटा ओनसोलनि रावसायाव मान दिन्थिग्रा (Honorific) मुंराइनि बाहायथि गैया। नाथाय आथिखालाव एफा एनै बाहायनो हमदों।

ख) थावनि दिन्थिग्रा मुंराइ: बर’ रावाव थावनि दिन्थिग्रा मुंराया मोननै-खाथि आरो गोजान। कुमारिकाटा ओनसोलनि रावसायाव थावनि दिन्थिग्रा मुंराइनि खाथि आरो गोजान फोरमायनाय मोननैबो बाहागोआवनो मानगोनां रावनिफ्राय फारागथि नुनो मोनो। जेरै-

	मा:गो:रा:	कु:ओ:रा:
खाथि	बे/ बेयो (बेयो आंनि बिजाब) (बे खोलोमा आंनि)	इ/ ए/ एयो/ इयो (एयो आंनि खिथाब) (इ फावथेना आंनि)
गोजान	बै/ बैयो/ बैयाव (बैयो जोंनि मोसौ) (बैयो आंनि गस्ला)	ओइ/ ओइयो/ ओइयाव (ओइओ जोंनि मोखौ) (ओइयो आंनि सला)

4.3 मावरिजा आरो सोदोब बेखेवफा (Case and Case-ending):

मोनसे बाथ्राया आबुं ओंथि फोरमायनो हायो बे बाथ्रायाव थानाय सोदोबफोरनि गेजेराव खान्थियारि सोमोन्दो (Linear sequence) थानायनि थाखाय। बे बिथिङाव बाथ्रायाव थानाय खायसे सोदोबा थाइजा सोदोबजों आंगो सोमोन्दो थायो। मोनसे बाथ्रायाव थानाय मुंमा एबा मुंराइजों थाइजानि गेजेराव थानाय सोमोन्दोखौ दिन्थिनाय एबा मुंमा एबा मुंराया थाइजाजों सोमोन्दो दिन्थिनाय आयदायानो जादों मावरिजा। बर’ रावाव गासै मोनस्नि मावरिजाफोर दङ। बेफोर जाबाय-

क) मावग्रा मावरिजा (Nominative Case)

ख) मावजाग्रा मावरिजा (Accusative Case)

ग) मावफाग्रा मावरिजा (Instrumental Case)

घ) हरमोनग्रा मावरिजा (Dative Case)

ङ) सोमजायग्रा मावरिजा (Ablative Case)

च) सोमोन्दो दिन्थिग्रा मावरिजा (Genitive Case)

छ) मावजाथा मावरिजा (Locative Case)

फारसेथिं ‘‘जायफोर दाजाबदानि गेजेरजों मावरिजाफोरनि सोमोन्दै मिथिनो मोनो बेखौनो सोदोब बेखेवफा बुङो।’’⁵ सोदोब बेखेवफाखौ बेखेवफा दाजाबदा होननाबो बुङो। सोदोब बेखेवफा एबा बेखेवफा दाजाबदाया मावरिजाजों दाजाबजायो। बर’ रावाव सोदोब बेखेवफाया मावरिजाखौ बिथा खालामनानै गासै मोनस्नि बाहागोनि दङ। सोदोब बेखवफा एबा बेखेवफा दाजाबदाफोरा मावरिजा आरो थाइजानि गेजेराव थानाय सोमोन्दोखौ रोखा खालामना होयो। कुमारिकाटा ओनसोलनि रावसायाव सोदोब बेखेवफानि मोननैसो बाहागोआव मानगोनां रावनिफ्राय फारागथि थानायखौ नुनो मोनो। जेरै-

मावरिजा	सोदोब बेखेवफा	माःगोःराः	कुःओःराः
मावग्रा मावरिजा	बेखेवगासे	-आ/ -ओ/ -हा	-आ/ -ओ
मावजाग्रा मावरिजा	बेखेवगानै	-खौ	-खो
मावफाग्रा मावरिजा	बेखेवगाथाम	-जों	-दो
हरमोनग्रा मावरिजा	बेखेवगाब्रै	-नो	-नो
सोमजायग्रा मावरिजा	बेखेवगाबा	-नि-फ्राय	-नि-फाय
सोमोन्दो दिन्थिग्रा मावरिजा	बेखेवगाद’	-नि	-नि
मावजाथा मावरिजा	बेखेवगास्नि	-आव	-आव

गाहायाव मानगोनां राव आरो कुमारिकाटा ओनसोलनि रावसानि बेखेवफानि बाहायथिनि बिदिन्थि होनाय जाबाय-

	मा:गो:रा:	कु:ओ:रा:
बेखेवगासे	क) रामा बिजाब फरायदों। (राम-आ) ख) बियो ओंखाम जादों। (बि-ओ) ग) आंहा रां दङ। (आं-हा)	क) रामा खिथाब फरायदो। (राम-आ) ख) इयो आखाम जादो। (इ-ओ) ग) आङा फैसा दङ। (आं-आ)
बेखेवगानै	क) आदाया मोसौखौ बुदों। (मोसौ-खौ) ख) रामा गस्लाखौ सुदों। (गस्ला-खौ)	(क) आदाया मोखौखो बुदो। (मोखौ-खो) (ख) रामा सलाखो सुदो। (सला-खो)
बेखेवगाथाम	क) आं साइकेलजों थांगोन। (साइकेल-जों) ख) आं नोंजों मावफागोन। (नों-जों)	(क) आं साइकेलदो थांगोन। (साइकेल-दो) (ख) आं नोंदो मावफागोन। (नों-दो)
बेखेवगाब्रै	क) आदाया आंनो रां होदों। (आं-नो) ख) आफाया आदानो बिजाब लाबोदों। (आदा-नो)	(क) आदाया आंनो फैसा होदो। (आं-नो) (क) आफाया आदानो बिजाब लाबोदो। (आदा-नो)
बेखेवगाबा	क) रमेना न’निफ्राय ओंखारलांबाय। (न’ नि-फ्राय) ख) सिताया आंनिफ्राय रां लादों। (आं-निफ्राय)	(क) रमेनआ न’निफाय ओंखारलांबाय। (न’ निफाय) (ख) सिताया आंनिफाय फैसा लादो। (आं-निफाय)
बेखेवगाद’	क) बियो आंनि गोसोनि खोथाखौ बुजियो। (आं-नि) ख) आइया आंनि गस्लाखौ सुदों। (आं-नि)	क) इयो आंनि गोसोनि खोथाखो बुजि मोनो। (आं-नि) (ख) आइया आंनि सलाखो सुदो। (आं-नि)
बेखेवगास्नि	क) सिताया न’वाव फैबाय। (न’-आव) ख) आं फरायसालियाव थांनोसै। (फरायसालि-आव)	(क) सिताया न’वाव फायबाय। (न’-आव) (ख) आं फरायसालियाव थांनोसै। (फरायसालि-आव)

मख’नो गोनांदि मानगोनां रावाव बाहायनाय बेखेवगासेनि सोदोब बेखेवफा ‘-हा’ नि बाहायथिया कुमारिकाटा ओनसोलनि रावसायाव गैया। मानगोनां रावनि बेखेवगानैनि सोदोब बेखेवफा ‘-खौ’ आ कुमारिकाटा ओनसोलनि रावसायाव ‘-खो’ महरै बाहायजायो। बेनि अनगायैबो मानगोनां रावाव बाहायजानाय बेखेवगाथामनि ‘-जों’ सोदोब बेखेवफाया कुमारिकाटा ओनसोलनि रावसायाव ‘-दो’ महरै बाहायजायो आरो मानगोनां रावाव बाहायनाय बेखेवगाबानि सोदोब बेखेवफा ‘-नि-फ्राय’ आ कुमारिकाटा ओनसोलनि रावसायाव ‘-नि-फाय’ महरै बाहायजायो।

4.4 सोदोबनि उनाव जनाय सोदोब (Post Position):

बर’ रावाव Post Position आ सोमजायग्रा मावरिजाजोंल’ जयो एबा बाहायजायो। “Post Position आ जाबाय इंराजी Preposition नि उल्था। Preposition आ इंराजी रावाव जेरै सोदोबनि सिगाङाव जफायो बे बादिनो Post Position आबो बर’ रावाव सोदोबनि उनाव जफायो। Post Position फोरनि महरा माब्लाबाबो सोलाय-सोल’ जाया, जेरै दं एरैनो थायो।’’6 मानगोनां रावनि मुंमायारि सोदोबनि उनाव जग्रा Post Position सोदोब – ‘बादि’ आरो ‘थिं’ आ कुमारिकाटा ओनसोलनि रावसायाव ‘बायसा’ आरो ‘थि’ महरै बाहायजायो आरो मानगोनां रावनि थाइजायारि सोदोबनि उनाव जग्रा Post Position सोदोब ‘दां’ आरो ‘साय’ आ कुमारिकाटा ओनसोलनि रावसायाव ‘खोमा’ आरो ‘सं’ जायो। जेरै-

	मा:गो:रा:		कु:ओ:रा:
क) बादि:	आं रामनि बादि गस्ला बायगोन। नों आंनि बादि माव।	क) बायसा:	आं रामनि बायसा सला बायगोन। नों आंनि बायसा माव।
ख) थिं:	सोनाबथिं थां। खोलाथिं फै।	ख) थि:	सोनाबथि थां। खोलाथि फाय।
ग) दां:	बिबारिया थांगोन दां। आदाया जागोन दां।	ग) खोमा:	बिबारिया थांगोन खोमा। आदाया जागोन खोमा।
घ) साय:	नों थांनाय साय। राजु जानाय साय।	घ) सं:	नों थांनाय सं। राजु जानाय सं।

मख’नो गोनांदि कुमारिकाटा ओनसोलनि रावसायाव Post- Position सोदोबखौ मानगोनां रावनिफ्राय फारागथियै बाहायब्लाबो ओंथिनि बिथिङाव जेबो सोलायसोल’ जाया।

4.5 सानराइ (Number):

सरासनस्रायै मानसि, जिब-जुनार आरो मुवा बेसाद बायदिनि अनजिमा एबा बिसानखौ फोरमायनाय बिथिङानो जादों सानराइ। बर’ रावाव सानराइया मोननै- से सानराइ आरो बां सानराइ। मोनसे, सासे एबा मासेखौ थियै फोरमायब्ला से सानराइ आरो बेनि बांसिनखौ फोरमायोब्ला बां सानराइ बुङो।

मानगोनां राव आरो कुमारिकाटा ओनसोलनि रावसानि गेजेराव सानराइनि बिथिङाव फारागथिखौ बां-सानराइ फोरमायग्रा दाजाबदा बाहायनायाव नुनो मोनो। बेफोर जाबाय-

क) सोमोन्दो सोदोबमा (Kinship Term) जों बां सानराइ फोरमायनो थाखाय मानगोनां रावाव बाहायनाय -‘मोन’ दाजाबदाखौ कुमारिकाटा ओनसोलनि रावसायाव ‘-मु’ महरै बाहायनाय नुनो मोनो। जेरै-

मा:गो:रा:	कु:ओ-रा:
आदा-मोन > आदामोन बाजै-मोन > बाजैमोन आफा-मोन > आफामोन आब’-मोन > आब’मोन आयं-मोन > आयंमोन गुमै-मोन > गुमैमोन आमाइ-मोन > आमाइमोन आनै-मोन > आनैमोन	आदा-मु > आदामु बाजै-मु > बाजैमु आफा-मु > आफामु आब’-मु > आब’मु आयं-मु > आयंमु गुमै-मु > गुमैमु आमाइ-मु > आमाइमु आनै-मु > आनैमु

4.6 थाइजानि बिदिन्था (Tense):

‘‘जाय दाजाबदाफोरा थाइजाजों जफानानै थाइजानि खामानि जानायनि समखौ फोरमायनानै होयो बोखौनो थाइजानि बिदिन्था होननानै बुङो।’’⁷ बर’ रावाव थाइजानि बिदिन्थिया मोनथाम रोखोमनि दं। बेफोर जाबाय-

क) जाखां बिदिन्था (Past Tense)

ख) जाफु बिदिन्था (Present Tense)

ग) इयुन बिदिन्था (Future Tense)

बे मोनथाम बिदिन्थाखौ मोननै मोननै बाहागो खालामनानै सावरायो। बेफोर फारियै- i) दा जाखां बिदिन्था, ii) सिगां जाखां बिदिन्था, iii) अराय जाफु बिदिन्था, iv) दा जाफु बिदिन्था, v) खाथि इयुन बिदिन्था आरो vi) गोजान इयुन बिदिन्था। बर’ रावाव बे मोनद’ बिदिन्थाखौ फोरमायनो मोनफ्रोमजोंबो गुबुन गुबुन दाजाबदा बाहायनाय जायो। कुमारिकाटा ओनसोलनि रावसायाव बिदिन्था फोरमायनो दाजाबदा बाहायनाय बिथिङाव मानगोनां रावनिफ्राय इसे फारागथि दं। गाहायै सिगां जाखां बिदिन्था आरो दा जाफु बिदिन्था बे मोननै बिदिन्थाखौ फोरमायनो दाजाबदा बाहायनायाव मानगोनां राव आरो कुमारिकाटा ओनसोलनि रावसानि गेजेराव फारागथि नुनो मोनो। जेरै-

सिगां जाखां बिदिन्था: मानगोनां रावाव सिगां जाखां बिदिन्थाखौ फोरमायनो थाखाय थाइजाजों ‘-दों-मोन’ बिदिन्था दाजाबदा दाजाबो। नाथाय कुमारिकाटा ओनसोलनि रावसायाव ‘-दो-मोन’ बिदिन्था दाजाबदा दाजाबनाय जायो। जेरै-

मा:गो:रा:	कु:ओ:रा:
क) आं ओंखाम जादोंमोन। (जा-दों-मोन) ख) रामा हाथाइसिम थांदोंमोन। (थां-दों-मोन) ग) बियो ना हमदोंमोन। (हम-दों-मोन) घ) बिसोर बल गेलेदोंमोन। (गेले-दों-मोन) ङ) जों बिजाब फरायदोंमोन। (फराय-दों-मोन)	क) आं आखाम जादोमोन। (जा-दो-मोन) ख) रामा हाथायालागै थांदोमोन। (थां-दो-मोन) ग) इयो ना हमदोमोन। (हम-दो-मोन) घ) इसोर बल गेलेदोमोन। (गेले-दो-मोन) ङ) जों खिथाब फरायदोमोन। (फराय-दो-मोन)

दा जाफु बिदिन्था: दा जाफु बिदिन्थाखौ फोरमायनो थाखाय मानगोनां रावाव थाइजाजों ‘-दों’ बिदिन्था दाजाबदा दाजाबो नाथाय कुमारिकाटा ओनसोलनि रावसायाव ‘-दो’ बिदिन्था दाजाबनाय जायो। जेरै-

मा:गो:रा:	कु:ओ:रा:
क) आं बिजाब फारायदों। (फराय-दों) ख) सिताया दै लोंदों। (लों-दों) ग) बाजैया सि सुदों। (सु-दों) घ) रिताया खारदों। (खार-दों) ङ) जों दुगैदों। (दुगै-दों)	क) आं खिथाब फरायदो। (फराय-दो) ख) सिताया दै लोंदो। (लों-दो) ग) बाजैया हि सुदो। (सु-दो) घ) रिताया खारदो। (खार-दो) ङ) जों दुगैदो। (दुगै-दो)

बर’ रावनि थाइजानि बिदिन्थिनि गुबुन मोनसे बिथिङा जादों गौमोन बिदिन्था (Conditional Tense)। बे गौमोन बिदिन्थाखौ फोरमायनो थाखाय दाजाबदा बाहायनाय बिथिङावबो कुमारिकाटा ओनसोलनि रावसा आरो मानगोनां रावनि गेजेराव फारागथि नुनो मोनो। गौमोन बिदिन्थाखौ फोरमायनो थाखाय मानगोनां रावाव थाइजाजों ‘-गौ-मोन’ बिदिन्था दाजाबदा दाजाबो नाथाय कुमारिकाटा ओनसोलनि रावसायाव ‘-गो-मोन’ बिदिन्था दाजाबदा दाजाबनाय जायो। जेरै-

मा:गो:रा:	कु:ओ:रा:
क) आं ओंखाम जागौमोन। (जा-गौमोन) ख) आं गुवाहाटियाव थांगौमोन। (थां-गोमोन) ग) बियो फैगौमोन। (फै-गौमोन) घ) आं गाइखेर लोंगौमोन। (लों-गौमोन)	क) आं आखाम जागोमोन। (जा-गोमोन) ख) आं गुवाहाटियाव थांगोमोन। (थां-गोमोन) ग) इयो फयगोमोन। (फा-गोमोन) घ) आं गाइखेर लोंगोमोन। (लों-गोमोन)

4.7 थाइलालि (Adjective):

मानसि, जिब-जुनार, मुवा-बेसाद बायदिनि गाब, महर, अनजिमा, मोजां-गाज्रि गुन बायदिखौ फोरमायनानै होनायानो जादों थाइलालि। थाइलालिनि बिथिङावबो कुमारिकाटा ओनसोलनि रावसा आरो मानगोनां रावनि गेजेराव फारागथि नुनो मोनो। जेरै-

मा:गो:रा:	कु:ओ:रा:
गिदिर मोजां गाज्रि बुथुवा गोदै अलसिया गोखा गोजा गोरलै	गोदोर गाहाम बया/ हामा गेदा दोद्दै बादोल गोख्खा गोज्जा गोल्लै

4.8 थाइजानि थाइलालि (Adverb):

बर’ रावाव थाइजानि थाइलालिखौ मोनथाम बाहागोनि मोननो हायो। बेफोर जाबाय-

क) सम दिन्थिग्रा थाइजानि थाइलालि (Adverb of time)

ख) आखु दिन्थिग्रा थाइजानि थाइलालि (Adverb of Manner)

ग) थावनि दिन्थिग्रा थाइजानि थाइलालि (Adverb of Place)

बे मोनथामबो बाहागोनि थाइजानि थाइलालिनि बिथिङाव मानगोनां राव आरो कुमारिकाटा ओनसोलनि रावसानि गेजेराव फारगथि थानायखौ गाहायाव दिन्थिनाय जाबाय-

क) सम दिन्थिग्रा थाइजानि थाइलालि: बे रोखोमनि थाइजानि थाइलालिया थाइजानि खामानि जानायनि थि सम आरो बुब्लिनि खौरां होयो। जेरै-

मा:गो:रा:	कु:ओ:रा:
दिनैसिम समफोर मैया माब्ला दिनै गाबोन	धिनियालागै समिया मिया मब्ला धिनै गामोन

ख) आखु दिन्थिग्रा थाइजानि थाइलालि: बे रोखोमनि थाइजानि थाइलालिया थाइजानि खामानि मावनायनि आदबा माबादि बेनि गुमुर होयो। जेरै-

मा:गो:रा:	कु:ओ:रा:
गोबारै जोबोद गोबारै लासैयै थाबै/ गोख्रै हाखु-दाखु	गोसायै थिक गोसायै/ बिराद गोसायै लाखैयै माखारै उखा-मुखा

ग) थावनि दिन्थिग्रा थाइजानि थाइलालि: बे रोखोमनि थाइजानि थाइलालिया थाइजानि खामानि जाफुंनायनि जायगा एबा थावनिनि गुमुर होयो। जेरै-

मा:गो:रा:	कु:ओ:रा:
बबेयाव बेयाव बैयाव बबे	मुवा/ मौ इयाव ओइयाव मबे