मानगोनां बर’ राव आरो कुमारिकाटा ओनसोलनि रावसा : मोनसे रुजुथायारि सावरायनाय | Mangwnang Boro Rao Arw Kumarikata Wnswlni Raosa

आयदा- थाम

3.0 रिंसारखान्थि (Phonology):

मोनफाल’ रावनि रिंसारथि (Phoneme) नि सोमजिनाय, बाहायनाय, जथायनाय बायदिनि सोमोन्दै गोनोखोआरि आदबजों बिजिरनाय एबा फरायसंनायानो जादों रिंसारखान्थि (Phonology)। कुमारिकाटा ओनसोलनि रावसा आरो मानगोनां बर’ रावनि गेजेराव रिंसारखान्थिनि बिथिङाव फारागथिनि बाथ्रा बुंनाय लोगो लोगो रिंसारथिनि बाथ्रायानो गोसोआव बेरखांफैयो। मुंख’नो गोनांदि कुमारिकाटा ओनसोलनि रावसा आरो मानगोनां राव बे मोननैनि गेजेराव रिंसारथिनि फारागथिखौ गारां रिंसारथि (Vowel Phoneme) आरो खौरां रिंसारथि (Consonant Phoneme) नि बिथिङाव मोनो।

3.1 गारां रिंसारथि (Vowel Phoneme):

जायफोर रिंसारथिया उदाङै रिंसार होजायो एबा जायफोर रिंसारथिखौ गारां बोयोब्ला बिखा समफ्ल’ (Lung) निफ्राय ओंखारबोनाय बारा गारामा बिखबनि (Vocal Cord) अनगायै खुगा दन्दरनि जेरावबो हेंथा मोना लासेनो गोख्रैयै स’ गलाङो बेफोर रिंसारथिफोरखौनो गारां रिंसारथि बुङो। गासै गारां रिंसारथिफोरानो गारां गोनां (Voiced) रिंसारथि। बर’ रावाव गासै मोनद’ रोखोमनि गारां रिंसारथिफोर दं। बेफोर जाबाय- /इ, ओ, उ, ए, अ, आ/। गाहायाव बर’ रावनि गारां रिंसारथिनि मोनसे मासियारि फारिलाइ (Chart) दिन्थिनाय जाबाय-

बर’ रावाव बे मोनद’ गारां रिंसारथियाबो सोदोबनि गिबि, गेजेर आरो जोबथा मोनथामबो जायगायाव उदाङै बाहायजायो। कुमारिकाटानि ओनसोलारि रावसायावबो बे मोनद’ गारां रिंसारथिफोरनि बाहायथि मोननो हायो। नाथाय मख’नो गोनां बाथ्राया जादों कुमारिकाटा ओनसोलनि रावसा आरो मानगोनां रावनि गेजेराव रिंसारथिफोरनि बिथिङाव सोलाय सोल’ जानायखौ मोननो हायो। गाहायाव बेफोरखौ बिदिन्थिजों लोगोसे दिन्थिनाय जाबाय-

क) मानगोनां रावाव सोदोबनि सिगां आरो गेजेर थावनियाव थानाय /इ/ गारां रिंसारथिया कुमारिकाटा ओनसोलनि रावसायाव /ए/ रिंसारथि महरै गारां बोजायो। जेरै-

ख) मानगोनां रावनि सोदोबनि जोबथा जायगायाव बाहायजानाय /इ/ रिंसारथिया कुमारिकाटा ओनसोलनि रावसायाव गोबां समाव /ओइ/ (ऐ)गारांनै रिंसारथि महरै बाहायजायो। जेरै-

ग) मानगोनां रावनि /उ/ रिंसारथिया कुमारिकाटा ओनसोलनि रावसायाव माब्लाबा माब्लाबा /ओ/ रिंसारथिनि महर लायो। जेरै-

घ) मानगोनां रावनि /ओ/ गारां रिंसारथिया कुमारिकाटा ओनसोलनि रावसायाव माब्लाबा /इ/ रिंसारथि महरै गारां बोजानाय नुनो मोनो। जेरै-

ङ) माब्लाबा मानगोनां रावनि सोदोबनि जोबथा थावनियाव थानाय /ओउ/ (औ) गारांनै रिंसारथि (Diphthong) नि सोलायै कुमारिकाटा ओनसोलनि रावसायाव /ओ/ रिंसारथिखौ बाहायनाय नुनो मोनो। जेरै-

च) माब्लाबा मानगोनां रावनि /ओ/ रिंसारथिया कुमारिकाटा ओनसोलनि रावसायाव /आ/ रिंसारथि महरै गारां बोजायो। जेरै-

छ) मानगोनां रावनि /आ/ रिंसारथिया कुमारिकाटा ओनसोलनि रावसायाव माब्लाबा /अ/ महरै गारां बोजानायखौबो नुनो मोनो। जेरै-

गोजौआव होनाय बिदिन्थिफोरानो रोखायै फोरमान होयोदि मानगोनां राव आरो कुमारिकाटा ओनसोलनि रावसानि गेजेराव गारां रिंसारथिफोरा सोलाय सोल’यै बाहाय जायो।

3.2 खौरां रिंसारथि (Consonant Phoneme):

जायफोर रिंसारथिया उदाङै रिंसार होजाया एबा जायफोर रिंसारथिखौ गारां बोयोब्ला बिखा सिंनि समफ्ल’ (lung) निफ्राय ओंखारबोनाय बारा खुगा दन्दरनि गुबुन गुबुन गारां अंगफोराव हेंथा मोनो, बेफोर रिंसारथियानो खौरां रिंसारथि। बर’ रावाव मोननै खाव गारां (Semi vowel) रिंसारथिखौ लाफानानै गासै मोनजिद’ (16) खौरां रिंसारथिफोर दङ। बेफोर जाबाय- /फ, ब, थ, द, ख, ग, स, ज, ह, म, न, ङ, र, ल, व, य/। बर’ रावनि खौरां रिंसारथिफोरखौ गारां बोनाय जायगा (Place of Articulation) नि बिथिंनिफ्राय मोनबा बाहागोआव रान्दों, गारां बोनाय आदब (Manner of Articulation)नि बिथिंनिफ्राय मोनद’ आरो गारां (Voicing) नि बिफावनि बिथिंनिफ्राय मोननै बाहागोआव रान्दों। गाहायाव बर’ रावनि खौरां रिंसारथिनि मोनसे मासियारि फारिलाइ होनाय जाबाय-

कुमारिकाटा ओनसोलनि रावसायाव मानगोनां रावनि बे मोनजिद’ खौरां रिंसारथिफोरजों लोगोसे आरोबाव गुबुन मोनथाम गासै मोनजिगु खौरां रिंसारथिफोरनि बाहायथि मोननो हायो। बेफोर- /फ, ब, भ, थ, द, ध, ख, ग, घ, स, ज, ह, म, न, ङ, र, ल, व, य/। कुमारिकाटा ओनसोलनि रावसानि खौरां रिंसारथिनि फारिलाइखौ गाहायाव होनाय बादि दिन्थिनो हायो जेरै-

कुमारिकाटा ओनसोलनि रावसायाव मानगोनां रावाव बाहायजानाय खौरां रिंसारथिफोरा सोलाय-सोल’ जायो। थामहिनबा मानगोनां राव आरो कुमारिकाटा ओनसोलनि रावसानि गेजेराव खौरां रिंसारथिफोरखौ बाहायजानायनि बिथिङाव फारागथि नुनो मोनो। बेफोरखौ गाहायाव बिदिन्थिजों लोगोसे दिन्थिबाय। जेरै-

क) मानगोनां रावनि सोदोबाव जनाय गुसथिजाब, सुइजाब /ब/ खौरां रिंसारथिया माब्लाबा कुमारिकाटा ओनसोलनि रावसायाव गुस्थिजाब, गन्थङारि /म/ खौरां रिंसारथिनि महर लायो। जेरै-

ख) मानगोनां रावनि सोदोबाव बाहायजानाय हाथाइगुदि, हांदुं /स/ रिंसारथिया कुमारिकाटा ओनसोलनि रावसायाव थालो उन, सुइजाब /ख/ रिंसारथि महरै बाहायजायो। जेरै-

ग) माब्लाबा माब्लाबा मानगोनां रावाव बाहायजानाय हाथाइगुदि, सुइजाब हांगुरै /द/ रिंसारथिनि जायगायाव कुमारिकाटा ओनसोलनि रावसायाव हाथाइगुदि, सुइजाब हांगोरा /ध/ (बर’ मानगोनां रावाव बाहायजायै) खौरां रिंसारथिखौ बाहायनाय नुनो मोनो। जेरै-

घ) मानगोनां रावनि सोदोबाव बाहायजानाय हाथाइगुदि, हांदुं /ज/ रिंसारथिया कुमारिकाटा ओनसोलनि रावसायाव माब्लाबा हाथाइगुदि, सुइजाब /द/ रिंसारथिसिम महर सोलायो। जेरै-

ङ) माब्लाबा मानगोनां रावनि सोदोबनि सिगां थावनियाव बाहायजानाय गुसथिजाब, सुइजाब हांगुरै /ब/ रिंसारथिया कुमारिकाटानि ओनसोलारि रावसायाव गुस्थिजाब, सुइजाब हांगोरा /भ/ (बर’ मानगोनां रावाव गैयै) रिंसारथि महरै गारां बोजायो। जेरै-

च) मानगोनां रावाव सोदोबनि जोबथा थावनियाव बाहायजानाय हाथाइगुदि, खम्फिखां /र/ रिंसारथिया कुमारिकाटा ओनसोलनि रावसायाव माब्लाबा माब्लाबा हाथाइगुदि, सुइजाब, हांगुरै /द/ रिंसारथि महरै गारां बोजायो। जेरै-

छ) मानगोनां रावाव बाहायजानाय थालोउन, सुइजाब हांगुरै /ग/ रिंसारथिया कुमारिकाटा ओनसोलनि रावसायाव थालोउन, सुइजाब, हांगोरा /घ/ (बर’ मानगोनां रावाव गैयै) खौरां रिंसारथि महरै गारां बोजानाय नुनो मोनो। जेरै-

ज) मानगोनां रावनि सोदोबाव बाहायजानाय गुस्थिजाब सुइजाब /फ/ रिंसारथिया माब्लाबा कुमारिकाटा ओनसोलनि रावसायाव /भ/ (बर’ मानगोनां रावाव गैयै) रिंसारथि महरै गारां बोजानायखौ मोननो हायो। जेरै-

झ) मानगोनां रावनि सोदोबाव बाहायजानाय गुस्थिजाब सुइजाब /ब/ रिंसारथिया कुमारिकाटा ओनसोलनि रावसायाव माब्लाबा गुस्थिजाब सुइजाब /फ/ रिंसारथि महरै गारां बोजानायखौ नुयो। जेरै-

ञ) मानगोनां रावाव बाहायजानाय मोनसेल’ खौरां रिंसारथिया कुमारिकाटा ओनसोलनि रावसायाव गोबां समाव जथाइ खौरां रिंसारथि (Consonant Cluster) महरै गारां बोजानाय नुनो मोनो। जेरै-

गोजौआव होनाय बिदिन्थिफोरनिफ्राय रोखा जानो हायोदि मानगोनां बर’ राव आरो कुमारिकाटा ओनसोलनि रावसानि गेजेराव खौरां रिंसारथिफोरनि बाहायथिनि बिथिङाव गोबां फारागथि दङ।

3.3 गारां बोनायनि जाहोनाव नुजानाय फाराग (Accent):

मोनसे सोदोबानो माब्लाबा गारां बोनायनि बिथिंखौ लानानै फारागथि नुजायो बेनो जादों गारां बोनायनि जाहोनाव नुजानाय फाराग (Accent)। बर’ रावाव बेबादि फारागखौ गाहायै सोमोन्दो सोदोबमा (Kinship term) नि बिथिङाव नुनो मोनो बेनि अनगायैबो खायसे खायसे मुंमा सोदोबफोरनि बिथिङाव मोननो हायो। खायसे रिंसारजथाइनै सोदोबा मानगोनां रावाव गिबि रिंसार जथायाव एसेल’ बोलो गोलैयो आरो उननि रिंसार जथाइयाव बांसिन बोलो गोलैयो। नाथाय कुमारिकाटा ओनसोलनि रावसायाव बेनि उल्था जायो थामहिनबा गिबि रिंसार जाथायाव बांसिन बोलो गोलैनानै उननि रिंसार जथायाव एसेल’ बोलो गोग्लैयो। गाहायाव बेनि मोननैसो बिदिन्थि होनाय जाबाय-

गोजौनि बिदिन्थियाव ( ’ ) बे नेरसोनजों बांसिन बोलो गोग्लैनायखौ दिन्थिदों आरो ( ‘ ) बे नेरसोनजों एसेल’ बोलो गोग्लैनायखौ दिन्थिदों।