मानगोनां बर’ राव आरो कुमारिकाटा ओनसोलनि रावसा : मोनसे रुजुथायारि सावरायनाय | Mangwnang Boro Rao Arw Kumarikata Wnswlni Raosa

आयदा- नै

2.0 रावसा (Dialect):

इंराजी ‘Dialect’ सोदोबनि थाखाय बर’ रावाव ‘रावसा’ सोदोबखौ बाहायदों। ‘‘बयजोंबो रायलायजानाय, बुजिलायनाय मोनफा गेदेर रावनि भुमखौरां आरो समाजारि जाहोननि थाखाय महर लानाय फारागथि गोनां बाहायथिखौनो थोंजोङै रावसा बुंनाय जादों। थामहिनबा रावसाया जाबाय मोनफा रावनि फारागथिगोनां आखुथाइजों दाब दाब जायगायाव रायलायजानाय राव।’’¹ मोनसे रावसाया मानगोनां रावनिफ्राय रिंसारखान्थि, महरखान्थि, बाथ्राखान्थि, ओंथिखान्थि बायदिनि बिथिङावल’ एफा-एनै आलादा जायो एबा सोलाय-सोल’ जायो आरो माब्लाबा सोदोबनि हांखो बाहायनायावल’ जुदा जुदा जायो। R. Tim नि ‘Encyclopaedic Dictionary of Linguistics’ आव रावसानि सोमोन्दै ओरै बुंदों- “A specific form of a given language, spoken in certain locality or geographic area showing sufficient differences from the standard or literary form of that language, as to pronunciation, grammatical construction and idiomatic usage of words, to be consider a distinct entity, yet not sufficiently distinct form of other dialects of the language to be regarded as a different language.”

रावसाखौ मोनसे रावनिनो गुबुन महर (Language variation) होनना मिथिनाय जायो। बेफोरबादि रावनि गुबुन महरा ओनसोलारि आरो समाजारि बिथिंनिफ्राय नुजाथिनो हागौ। थांलायनाय-फैलायनाय गैलायै (communication gap) आ रावसा सोमजिनायनि मोनसे मुंख’जाथाव जाहोन। बेनि अनगायैबो रावसा सोमजिनायाव राजखान्थियारि, मिथिंगायारि आरो धोरोमखान्थिनि खायसे जाहोनफोराबो गोहोम खोख्लैयो। मोनफ्रोम रावसायानो गावबा गाव जुनिया आखुथाइफोर थायो। बेफोर आखुथाइफोरा रिंसारखान्थि, महरखान्थि, बाथ्राखान्थि आरो सोदोब बाख्रिनि बिथिङाव नुजाथियो। अब्लाबो रावसा आरो मानगोनां राव बे मोननैबो रावानो। रावसा आरो मानगोनां राव बे मोननैबो रावजोंनो सुबुं माहारिया गावबा गावनि गोसोनि सानस्रि सुखु-दुखु, रंजानाय-बाजानाय, गियान, फोथायनाय, साननाय-हनाय बायदि-बायदिफोरखौ गावजों गाव फोरमायलायनानै समाजाव जिउ खुङो। मोनसे मख’नो गोनां बाथ्राया जादों मानगोनां रावाबो मोनसे रावसासो। बेखौ समाजनि सुबुंफोरा गावजों गाव गनायलायनायनि गेजेरजोंसो मानगोनां महर होनानै लादों। बे बिथिङाव राव बिगियानि स्वर्ण प्रभा चैनारीया फंसे बाथ्रा बुंदों- ‘‘जों जायखौ मानगोनां राव होनना बुङो बैबो मोनसे रावसा (Dialect) नि अनगायै जेबो नङा। समाजारि गनायथि (Social Acceptance) आल’सो बेनो मोनसे मानगोनां रावनि थाखोखौ होदों।’’²

2.1 बर’ रावसा (Boro Dialect)):

बर’ रावखौ रायग्रा सुबुंफोरा आसामनि दाब दाब जायगायाव गोसारद्लानानै थानायनि अनगायैबो बेंगल, नेपाल, बांलादेश बायदि बायदिफोरावबो गोसारद्लानानै दङ। बेफोर जायगाफोराव रायज्लायनाय बर’ रावखौ नोजोर होयोब्ला गोबां फारागथि थालायनायखौ नुनो मोनो। जेरै दैखंखोलानि बर’ रावजों आरो कक्राझारनि बर’ रावजों रुजुलायनानै नायोब्ला गोबां फारागथि मोनो। सानजा ओनसोल जेरै- बरपेटा, नलबारि, कामरुप, बाक्सा, अदालगुरि बायदिनि रावखौ कक्राझार ओनसोलनि बर’ रावजों रुजुलायनानै नायोब्लाबो गोबां फारागथिफोरखौ मोनो। बेबादिनो बेंगलनि बर’ राव आरो कक्राझारनि बर’ रावनि गेजेरावबो गोबां फारागथि मोननो हायो। बे फारागथिफोरखौ मोनगोन गाहायै रिंसारथि, सोदोब, ओंथि, महर बाहायनाय, बाथ्रानि बिथिङाव। जेखिजाया बर’ सुबुंफोरजों बाहायजानाय बर’ रावखौ नोजोर बोनानै Pramod Chandra Bhattacharya आ “A Descriptive Analysis of Boro Language” बिजाबाव बर’ रावसाखौ मोनब्रै बाहागो खालामदों। बेफोर जाबाय-

1. सा सोनाब गवालपारा आरो कामरुप

2. खोला सोनाब गवालपारा, गार’हाजो आरो खोला कामरुप

3. सा-गेजेर आसाम (दरं, लक्षिमपुर आरो NEFA नि खायसे ओनसोल)

4. खोला आसाम (नगाव, सा काछार, मिकिर हाजो आरो काछारनि खाथि खाला जायगा)।

गुबुन फारसेथिं जायगानि बिथिं आरो रावनि जरखा आखुथाइनि सायाव नोजोर होनानै बर’ रावखौ जोबोद गुवारै मोनब्रै रावसा ओनसोलाव राननानै सावरायनो हायो होनना फुकन चन्द्र बसुमतारीया गावनि ‘राव बिगियाननि फरा’ बिजाबाव मख’दों। जेरै-

1. सानजारि रावसा ओनसोल (Eastern Boro Dialect Area)

2. दैखंखोलारि रावसा ओनसोल (Southern Boro Dialect Area)

3. सोनाबारि रावसा ओनसोल (Western Boro Dialect Area)

4. बर’ मेच रावसा ओनसोल (Mech-Boro Dialect Area of North Bengal)।

2.2 ओनसोलारि रावसा (Regional Dialect):

गोजौआव बुंबोखादोंदि मोनसे रावसाया ओनसोलारि, समाजारि, राजखान्थियारि, धोरोमखान्थि बायदिनि माखासे जाहोनफोरनि थाखाय सोमजियो। गुबुनफारसे ‘‘मोनसे रावसानि सिङाव थानाय ओनसोलनिनो ओनसोल लायै ओनसोल नुजानाय जा फाराग बेखौनो ओनसोलारि रावसा (Regional dialect) होननानै बुंनाय जायो।’’³ मोनसे रावसानि सिङावनो माखासे ओनसोलारि रावसा थानो हागौ। बेबादिनो कुमारिकाटा ओनसोलनि रावसायाबो सानजायारि बर’ रावसा (Eastern Boro Dialect Area) नि सिङाव थानाय मोनसे ओनसोलारि रावसा। मानगोनां बर’ रावजों बै ओनसोलनि बर’ रावसाखौ गोबां फारागथि थालायनायखौ मोननो हायो। बै ओनसोलनि रावसाखौ मानगोनां बर’ रावनिफ्राय गाहायै रिंसारखान्थि, महरखान्थि, बाथ्राखान्थि आरो सोदोब बाख्रिनि बिथिङाव फारागथि नुनो मोनो। नाथाय बे रावसायानो बै ओनसोलनि बर’ सुबुंफोरनि आंगो राव। जेराव बै ओनसोलनि बर’ सुबुंफोरा बे रावखौ रायज्लायनानैनो गावसोरनि जिउखौ दैदेनबोदों। गुबुन हारिनि सिगाङाव बे रावसाजोंनो बर’ रावनि सिनायथिखौ होबोदों।