मानगोनां बर’ राव आरो कुमारिकाटा ओनसोलनि रावसा : मोनसे रुजुथायारि सावरायनाय | Mangwnang Boro Rao Arw Kumarikata Wnswlni Raosa

बे संजिर खामानि (Dissertation) खौ मुस्री अमरजित दैमारीया बर’ बिफाननि एम.ए. थाखोनि ब्रैथि फरायसमाव फरायनाय समाव लिरनाय ‘‘ मानगोनां बर’ राव आरो कुमारिकाटा ओनसोलनि रावसा : मोनसे रुजुथायारि सावरायनाय ’’ आयदा।

सिमान लानाय

संजिरनो लानाय आयदायानो जादों- ‘‘मानगोनां बर’ राव आरो कुमारिकाटा ओनसोलनि रावसा: मोनसे रुजुथायारि सावरायनाय’’ बे संजिरलाइखौ बड’लेण्ड मुलुगसोलोंसालिनि बर’ बिफाननि एम.ए. ब्रैथि फरायसमनि 4.5 पेपारनि थाखाय गथायनाय जादों। बे संजिरलाइखौ लिरनायाव खारिथिफोरखौ संजिरगिरिया गावनो जायगायाव थांनानै Field Survey खालामनानै बुथुमदों आरो खायसे खायसे खारिथिखौ फोसावजानाय बिजाबनिफ्राय लानाय जादों लोगोसे संजिरगिरिया गावनो बे ओनसोलनि जानायलाय खायसे खारिथिखौ थोंजों मोननाय जादों आरो नांगौ बादि खारिथिफोरखौ बुथुमनानै लानाय जादों। बे संजिरनाय बिलाइखौ बड’लेण्ड मुलुगसोलोंसालिनि एम.ए. ब्रैथि फरायसमनि 4.5 पेपारनि थाखाय गांसे Dissertation ग’थायनांगौनि थाखायसो संजिरना लिरनाय जादों।

गथायगिरि-

अमरजित दैमारी
एम.ए. ब्रैथि फरायसम

‘‘ मानगोनां बर’ राव आरो कुमारिकाटा ओनसोलनि रावसा : मोनसे रुजुथायारि सावरायनाय ’’

(Mangwnang Boro Rao Arw Kumarikata Wnswlni Raosa : Mwnse Rujuthaiari Saorainai)

आयदा-से

1.0 जागायनाय (Introduction):

कुमारिकाटाया आथिखालनि B.T.A.D. नि बेंखनाय थानाय बाक्सा जिलानि तामुलपुर महकुमानि सिङाव थानाय मोनसे मौजानि मुं। भुटान राज्योनि सामद्रुप झंकार सहरनि खोला आफाङाव थानाय फालांगियारि मोनसे मेरु जायगा। भारत हादरनि उदांस्रिनि सिगां इं 1944 मायथाइयाव बृटिसनि समाव दाजानाय कुमारिकाटा मौजाया आथिखालाव फिसा टाउन जानो थांनायनि लामायाव। कुमारिकाटा ओनसोलाव बर’, असमीया, राभा, सर’निया, हाजं, सावथाल (आदिबासि), मुसलमान, नेपालि राजबंसि बायदि हारि आरो रावारि सुबुंफोर दं। बेफोरनि मादाव हारि हिसाबै बर’फोरानो सेथियाव दं एबा बांसिन।

रावा जादों मानसि माहारिया गोसोनि सानस्रिखौ गावजों गाव फोरमायलायग्रा आरो गावजों गाव सोमोन्दो लाखिलायनायनि बयनिख्रुइ देरसिन बिजों। रावखौ सुबुङा जोनोमजों लोगोसे मोनबोफाखायाखै। बेखौ आरजिनानै लानो हादों रोजा रोजा मुगानि रोंमोन्थाइ आरो आनजादनि गेजेरजों। मानसिनि सोदोमस्रिनि जारिमिना रावनि थाखायनो दावगाबोदों आरो गोसारनो खाबु मोन्दों। रावा मानसिनिल’ जर’खा सोरजि। रावानो मानसिनि साननो हानाय गोहो आरो गियानखौ बांहोदों जायनि थाखाय मानसिया गोदान गोदान सोलोजों गावखौ सोदोमस्रि गोनां खालामनो खाबु मोन्दों। रावनि थाखायनो मानसिया मिथिंगानि जिबि जानानैबो गुबुन गुबुन जिबिनिफ्राय आलादा आरो जरखा आखुजों गावखौनो सोरजिलु गोहो गोनां महरै दाना लानो हादों।

बर’ रावा Sino-Tibetan राव फोलेरनि बेंखनाव थानाय Tibeto-Burman राव हानजानि मोनसे मख’जाथाव राव। बे रावखौ रायग्रा सुबुंफोरा सा-सानजा भारतनि गुबुन गुबुन राज्योआव गोसारनानै दङ। लोगोसे भारतनि नसुं हादर नेपाल आरो बांलादेशआवबो गोसोरना दङ। बेनि गेजेराव आसाम राज्योनि बुरलुंबुथुर दैमानि सा आरो खोला सेरफाङाव बर’ राव रायग्रा सुबुंफोरा मैखोमै जिउ खुंनानै दङ। बर’ रावा इं 1963 मायथाइनि 18 मे खालारखालि गुदि फरायसालियाव सोलोंथाइनि बिजों महरै थिसनजायो बेनि उनाव इं 2003 माइथायाव बर’ रावा भारतनि संबिजिरनि डाइनथि फारिलाइ (8^th Schedule) आव थिसनजायो।

बे संजिरनायाव रावसा, बर’ रावसा आरो ओनसोलारि रावसानि सिनायथि होनायजों लोगोसे आथिखालनि B.T.A.D. नि बेंखनाव थानाय बाक्सा जिलानि तामुलपुर महकुमानि सिङाव थानाय कुमारिकाटा ओनसोलनि फुहुराबारि, दुब्लिबारि, भेराघाट, फाख्रिबारि, पानबारि आरो लनथिबारि बे मोनद’ मैखोम बर’ गामियाव रायज्लायनाय बर’ रावसानि रिंसारखान्थि गारां रिंसारथि, खौरां रिंसारथि, गारां बोनाय जाहोनाव नुजानाय फाराग, महरखान्थि, मुंमा, मुंराइ, मावरिजा आरो सोदोब बेखेवफा, सोदोबनि उनाव जनाय सोदोब, सानराइ, थाइजानि बिदिन्था, थाइलालि, थाइजानि थाइलालि, बाथ्राखान्थि, दाथायखौ लानानै बाथ्रानि बाहागो, गोरलै बाथ्रा, गलाय बाथ्रा, जथाइ बाथ्रा, सोदोबथि लाना बाथ्रानि बाहागो, फोरमायनाय दिन्थिग्रा बाथ्रा, सोंनाय दिन्थिग्रा बाथ्रा, थिननाय, बिथोन होनाय, खावलायनाय दिन्थिग्रा बाथ्रा, लुबैनाय एबा हास्थायनाय दिन्थिग्रा बाथ्रा, सानबोलाउरि दिन्थिग्रा बाथ्रा आरो सोदोब बाख्रिनि सायाव रावबिगियानारि आदबै संजिरनानै बर’ मानगोनां रावजों बेसेबां गोरोबनाय आरो गोरोबै दं बेखौ नोजोर होनाय जागोन।

1.1 संजिरनायनि थांखि (Aims of study):

मोनसे रावनि रावसाफोरखौ बुथुमजोबनो हायोब्ला बै रावा साबसिनै गेरेमसा जानो हायो आरो जौगानो हायो। कुमारिकाटा ओनसोलनि बर’ सुबुंफोरा मा रोखोमनि राव रायनानै गाव गावनि गोसोनि सानस्रि, गियान, रोंमोन्थाइ, फोथायनाय बायदिफोरखौ गावजों गाव फोरमायलायनानै जिउ खुङो बेखौ संजिरनाय आरो कुमारिकाटा ओनसोलनि रावसा रावा मानगोनां रावजों बेसेबां गोरोबनाय आरो गोरोबै दङ बेखौ संजिरनायानो बे आयदाखौ संजिरनायनि थांखि।

1.2 संजिरनायनि गोनांथि (Importance of study):

बर’ रावसाफोरा आसामनि दाब दाब जायगाफोराव गोसोरद्लानानै दङ लोगोसे आसामनि बायजोआवबो गोसारद्लाना दङ। बेफोर रावसाफोरखौ संजिरनायनि गेजेरजों रैखाथि होनो हायो, लोगोसे बेफोर रावसाफोरखौ बुरखांनानै मानगोनां रावखौ गेरेमसा खालामनो हायो। बेनिखायनो गासै रावसानि सायाव बिजिरसंनायनि गोनांथि दङ। जायनि थाखाय कुमारिकाटा ओनसोलनि बर’ रावसाखौ बिजिरसंनायनि गोनांथि होनाय जादों। लोगोसे बड’लेण्ड मुलुगसोलोंसालिनि बर’ बिफाननि ब्रैथि फरायसमनि बाथि बिलाइनि थाखाय गांसे Dissertation गथायनांगौ जानायलाय बे आयदानि सायाव संजिरनायनि गोनांथि होनाय जादों।

1.3 संजिरनायनि फुंखा (Source of Study):

मोनसे आयदानि सायाव संजिरनो थाङोब्ला गिबियावनो खारिथि बुथुमना लाथारनांगौ जायो। खारिथिनि सायाव बिथा खालामनानैसो मोनफा आयदाखौ संजिरनाया आबुं जानानै फैयो। बे आयदाखौ संजिरनायाव गुदि फुंखा (Primary Source) आरो लेङाइ फुंखा (Secondary Source) मोननैनिबो सायाव सोनारनाय जादों। गुदि फुंखा महरै सानैसो सुबुंनाव थोंजोङै सोंनाय-फिननाय खालामनाय जादों लोगोसे संजिरगिरिया गावनो बे ओनसोलनि जानायलाय गोबां खारिथिफोरखौनो थोंजोङैनो मोनदों एबा लादों। लेङाइ फुंखा महरै बिजाबफोरनि हेफाजाब लानाय जादों।

1.4 संजिरनायनि आदब (Methodology of study):

बे आयदाखौ संजिरनायाव गाहायै रुजुथायारि आदब (Method of study) खौनो थोंजोङै बाहायनाय जादों। बेनि अनगायैबो सम आरो खाबुखौ नायनानै गावारि आदबबो बाहायफानाय जादों।

1.5 सिगांग्रो सानमिजिं (Hypothesis):

मोनसे आयदानि सायाव संजिरनायनि गुदियावनो दं सिगांग्रो सानमिजिं। कुमारिकाटा ओनसोलनि बर’ रावसा आरो मानगोनां बर’ रावनि रिंसारखान्थि, महरखान्थि, बाथ्राखान्थि आरो सोदोबबाख्रिनि गेजेराव थानाय गोरोबलायै फारागथिखौ दिन्थिनायानो बे संजिरनायनि सिगांग्रो सानमिजिं।

1.6 थुनलाइ सावरायनाय (Review of Literature):

बबेबा मोनसे आयदानि सायाव बिजिरसंनो लायोब्ला थुनलाइ सावरायनायाबो गोनांथार। बर’ रावाव दिनैसिम रावनि सायाव लिरनाय बिजाबनि अनजिमाया जोबोद खम। बर’ रावाव सोलोंथाइनि खहाखौ सुफुंनो थाखायल’ साफा-सानै लिरगिरिफोरा मानगोनां रावनि रावखान्थि, सोदोबबाख्रिनि सायाव बिजाब लिरनानै दिहुनदों, नाथाय थोजासे जायाखै। अब्लाबो बर’ रावनि सायाव बिथांमोनादि बिजाब लिरनानै बर’ रावखौ सिबिदों, जौगाहोनो नाजादों बेखौ बाख्नायनांगोन। बिथांमोननि गेजेराव कमल कुमार ब्रह्म, मधुराम बर’, फुकन चन्द्र बसुमतारी, स्वर्ण प्रभा चैनारी, अलिन ब्रह्म, राजेन्द्र बसुमतारी, दुर्जय पाहार नारजारी। अब्लाबो नाथाय बर’ रावसाफोरखौ बुथुमनानै लिरनाय बिजाब मोननो गोब्राब, गांफा-गांनै सावरायबिदांफोरल’ मोननो हायो। जायनि थाखाय बर’ रावसाफोरनि सोमोन्दै जेबो गुमुर मोननो हायाखै। बेबादिनो कुमारिकाटा ओनसोलनि बर’ रावसानि सायावबो रावबो संजिरनाय खामानि मावाखै आरो बिजाबबो लिरनाय नुनो मोनाखै। बेनिखायनो बे आयदायाव कुमारिकाटा ओनसोलनि रावसाखौ मानगोनां रावजों रुजुनो नाजानाय जादों। बर’ रावनि खना खनला थानाय रावसाफोरखौ बुथुमजोबनो हायोब्ला बर’ रावा गेरेमसा जासिननो हागोन।