बरनि सुबुं मुलि : मोनसे सावरायनाय

बे संजिर खामानि (Project Work) खौ मुस्री अमरजित दैमारीया बर’ बिफाननि एम.ए. थाखोनि ब्रैथि फरायसमाव फरायनाय समाव लिरनाय ‘‘बर’नि सुबुं मुलि : मोनसे सावरायनाय’’ आयदा। बे लिरबिदांखौ जायफोर फरायसाफोरा माखासे संजिर खामानिखौ माबादियै लिरो बेखौ Idea होनाय आरो बिथांनि मिथोहोनो नाजानाय मोनसे गोनांथार आयदानि सायाव संजिरनाय लिरबिदां।

बर’नि सुबुं मुलि : मोनसे सावरायनाय

आयदा-से

1.0 जागायनाय (Introduction):

सरासनस्रायै सुबुं मुलिया जादों गोदो गोदायनिफ्रायनो सुबुंनि खुगा खुगा सोलिबोनाय मुलि, जायखौ बाहायनानै एबा जायनि गेजेरजों सुबुं माहारिया गावबा गावनि देहायाव जानाय रग-बियादि, लोमजानाय-साजानाय, बेराम-आजारफोरखौ फाहामबोदों। अदेबानि गोदो-गोदाय मिथिस’ हायै समनिफ्रायनो सुबुं माहारिया मिथिंगानि बिखायाव मोननो हानाय बिफां-लाइफांनि बिलाइ, बिबार, फिथाइ, बिगुर, देन्था, रोदा, बेन्दों-बेनला आरो जिब-जुनार, एम्फौ एनलानि बिदै, खि, हासुदै, बेदर बायदिफोरखौ उनग्लिनानै, देग्लिनानै, थावजों आवथिना एवखांनानै मुलि बानायनायखौनो सुबुं मुलि बुंनाय जायो।

सुबुं मुलिनि बाहायथाया बर’फोरनि गेजेराव गोदो गोदायनिफ्रायनो सोलिबोगासिनो दङ। गोदो-गोदाय Doctor फोर गैयैयाव आरो गोनोखोजों दिहुनजानाय मुलिफोर ओंखारथ’यैयाव सुबुं मुलि बाहायनानैनो बर’ सुबुंफोरा लोमजानाय साजानाय आरो बेराम जानायनिफ्राय रैखा मोननो हादों। आथिखालावबो लोमजाबा साजाबा बेरामफोर जायोब्ला सुबुं मुलि बाहायनाय हुदाया बर’फोरनियाव दङ। नाथाय सुबुं मुलि बाहायनानै बेराम फाहामनाय एबा नायनायखौ बर’फोरनि गेजेराव जोबोर खम सुबुङा रोंसै। बर’फोरा बाहायनाय सुबुं मुलिखौ नोजोर होनानै बर’नि सुबुं मुलिखौ मोननै बाहागो खालामनो हायो। बेफोर जाबाय-

1. मोन्थोर गोनां सुबुं मुलि।

2. मोन्थोर गैयै सुबुं मुलि।

बेयावहाय संजिरनायाव खाबु जानायनि थाखाय भांबारि गामिखौ बिथा खालामना बे गामिनि बर’ सुबुंफोरा गोदोनिफ्राय आथिखालसिम बाहायगासिनो थानाय सुबुं मुलिनि सोमोन्दै संजिरनो लादों। भांबारि गामिया बाक्सा जिलानि तामुलपुर महकुमा आरो कुमारिकाटा मौजानि सिङाव थानाय मोनसे बर’ गामि। आथिखालाव (2019)  बे गामियाव गं 75 सो नख’र दं आरो सुबुं अनजिमाया उन्दै गिदिर गासै 350-400 नि गेजेराव दं। बे संजिरनायाव भांबारि गामिनि सुबुंफोरा गोदोनिफ्रायनो आथिखालावबो बाहायबाय थानाय मोनथोर गैयै सुबुं मुलिनि सायावल’ संजिरनाय जागोन।

1.1 थांखि (Objective):

सुबुं मुलिनि मुं आरो बेनि बाहायथिफोरखौ बर’ सुबुंफोरनो फोरमायना होनाय आरो लिरथुमना दोननायानो बे संजिर हाबानि थांखि। जाहाथे बर’ सुबुंफोरा गाव गावसोरनि देहा-सोलेराव जानाय बायदि मैया बेमार-आजार, जखम, लोमजानाय-साजानाय बायदिफोरखौ गाव गावनो फाहामनानै लानो हायो। बेनि अनगायैबो बर’फोरनि गेजेराव सुबुं मुलिया गोदो-गोदायनिफ्रायनो खुगा-खुगासो सोलिबोगासिनो, नाथाय लिरनाय महराव गुवारै मोननो थाङाखै जायनि थाखाय बर’नि सुबुं मुलिनि सोमोन्दै मिथिनायाव गेदेर जेंना जानानै दं। बे जेंनाखौ सुस्रांनो थांखियैनो बे आयदाखौ संजिरनो थांखि लादों।

1.2 आदबखान्थि (Methodology):

बे आयदाखौ संजिरनायाव गाहायै फोरमायलुआरि आदब (Descriptive Method) बाहायनाय जादों। बेनि अनगायैबो सम आरो खाबुखौ नायनानै गावारि आदबबो बाहायनाय जादों।

1.3 खारिथि बुथुमनाय (Data Collection):

मोनफा आयदानि सायाव संजिरनो थाङोब्ला गिबियावनो खारिथि बुथुमना लागोरनांगौ जायो। खारिथिनि सायाव बिथा खालामनानैसो मोनफा आयदानि सायाव संजिरनाया आबुं जानानै फैयो। बे संजिरनाय हाबाखौ जाफुंहोनो थाखाय गुदि फुंखा (Primary Sourc) आरो लेङाइ फुंखा (Secondary Source) मोननैनिबो हेफाजाब लादों। गुदि फुंखा महरै भांबारि गामिनि सुबुं मुलिनि सायाव रोंगौथि गोनां सुबुंनिफ्राय सोंनानै बुथुमनाय जादों आरो लेङाइ फुंखा महरै बिजाबफोरनिफ्राय बुथुमनाय जादों। गाहायाव खारिथि होग्रा सुबुंफोरनि मुंखौ फारिलाइ खालामनानै होनाय जाबाय-

1.4 गोनांथि (Importance):

बर’नि सुबुं मुलिनि सोमोन्दै आथिखालनि बर’ सुबुंफोरहा मिथिबांलिया आरो सुबुं मुलिनि बाहायनाया गोमालांनो हमबाय, बेनिखायनो सुबुं मुलिनि सोमोन्दै आथिखालनि बर’ सुबुंनो मिथिहोनो आरो सुबुं मुलिनि बाहायथिखौ हमथानानै लाखिनो थाखायनो बे आयदानि सायाव संजिरनायनि गोनांथि होनाय जादों। लोगोसे बड’लेण्ड मुलुग सोलोंसालिनि बर’ बिफाननि ब्रैथि फरायसमनि बाथि बिलाइनि थाखाय गांसे Project गथायनांगौ जानायलाय बे आयदानि सायावनो संजिरनायनि गोनांथि होनाय जादों।

1.5 सिगांग्रो सानमिजिं (Hypothesis):

बे संजिरनाय खामानिनि सिगांग्रो सानमिजिंफोरा जादों-

क) सुबुं मुलि बानायनाय

ख) बेराम आरो सुबुं मुलिनि मुं

ग) सुबुं मुलिनि बान्जायनाय

घ) सुबुं मुलिनि जेंना

ङ) सुबुं मुलिखौ लानानै फोथायनाय

1.6 थुनलाइ सावरायनाय (Review of Literature):

बर’ सुबुं मुलिनि सायाव लिरनाय बिजाबनि अनजिमाया बर’ रावाव दासिमबो आसि बिजौआवनो सानजानाय। उन्दै कालिचरन ब्रह्मआ सुबुं मुलिनि सायाव ‘बर’नि जलंगा’ मुंनि बिजाबखौ लिरना दिहुनो। रेणु बर’आबो सुबुं मुलिनि सायाव ‘मुली जलंगा’ मुंनि गांसे बिजाब दिहुनो। नाथाय बिथांमोना लिरनायानो थोजासे जानो हाया।