बे संजिर खामानि (Dissertation) खौ पुजा रानि बसुमतारिया बर’ बिफाननि एम.ए. थाखोनि ब्रैथि फरायसमाव फरायनाय समाव लिरनाय ‘‘बर’ आरो असमिया रावनि थि दिन्थिग्रा दाजाबदा (numeral, classifiers or definitives) रुजुथायारि नोजोरजों मोनसे बिजिरनाय।’’ आयदा।
बर’ आरो असमिया रावनि थि दिन्थिग्रा दाजाबदा (numeral, classifiers or definitives) रुजुथायारि नोजोरजों मोनसे बिजिरनाय।
आयदा- 1
1.0 जागायनाय :
राव होन्नानै बुङोब्ला मानसिया गावनि गोसोनि सान्नाय एबा सानस्रिखौ गुबुननि सिगाङाव फोरमायनो बाहायनाय बिजोंआनो जाबाय राव। बे बुहुमाव मानसिनि अनगायै गासैबो जिब-जुनादफोरानो गोसोनि सान्नाय एबा सानस्रिखौ मोनफा मोनफा नेरसोन बाहायनानै फोरमायलायो। नाथाय बिसोरनि बेबादि फोरमायनो बाहायनाय नेरसोनखौ राव होन्नानै बुंजाया। बिथां र्स्णप्रभा चैनारिनि बर’ रावखान्थि बिजाबाव बुंनाय बादिब्ला- समजों लोगोसे मानसिनि खुगानि रावफोरा सोलायलांबाय थायो। नाथाय जिब-जुनारनि रावाव जेबो सोलाय सोल’ गैया गोदो जेरै दाबो बिदिनो दं आरो ओनसोल लायै ओनसोल मानसिनि रावा जुदा जुदा जायो। नाथाय जिब-जुनार, दावसिन-दावलाफोरनि रावा जुदा जाया। बे रावनि थाखायनो मानसिया बुहुमाव गासै जिब-जुनारफोरनिख्रुइ देरसिन जायगा लानो हादों। मानसिया जिब-जुनार, दावसिन-दावलानिफ्राय फाराग जानो हादों। मानसिया बुंनाय आरो लिरनाय बे मोननै बिजोंजों गाव गावनि साननाय हनायखौ फोरमायथिनो हायो। मानसिनि बेफोर रावफोरा बाथ्राफोरजों दाजानाय बे बाथ्राफोरा माखासे सोदोबफोर लोगो नांनानै जानाय आरो मोनफा सोदोबफोरा माखासे फिसा फिसा रिंसारफोरजों दाजानाय। बे रिंसारानो रावनि बयनिख्रुइ दुइसिन खोन्दो।
1.1 सावरायनो लानाय आयदा :
बे संजिर बिलाय (Dissertation Paper) आव आंनि आयदाया ‘‘बर’ आरो असमिया रावनि थि दिन्थिग्रा दाजाबदा numeral, classifiers or definitives) : रुजुथायारि नोजोरजों मोनसे बिजिरनाय।” बर’ आरो असमिया रावनि थि दिन्थिग्रा दाजाबदा बेनि बाहायनाय आरो बर’ आरो आसमिया रावाव गोरोबलायनाय, गोरोबलायैनि सोमोन्दै सावरायनो लानाय जादों।
1.2 बिजिरसंनायनि गोनांथि:
बड’ण्ड मुलुग सोलोंसालिनि सिङाव थानाय बर’ बिफानआव M.A. थाखोनि ब्रै (4) फरायसमनि थाखाय आयदा – 4 आव Dissertation Paper लिरनायनि गोनांथि जानाय बादियै आं बे Dissertation Paper आव बर’ आरो असमिया रावनि थि दिन्थिग्रा दाजाबदाखौ बिजिरनानै लिरनाय जादों।
1.3 बिजिरसंनायनि थांखि:
बर’ आरो असमिया रावनि गेजेराव थानाय माखासे थि दिन्थिग्रा दाजाबदाफोरनि गोरोबलायनाय आरो गोरोबलायैखौ रोखा रोखा फोरमायना होनायखौ आंनि Dissertation Paper लिरनायनि गुबै थांखि।
1.4 बिजिरसंनायनि खान्थि:
बे आयदायाव खान्थि बायदियै बर’ आरो असमिया रावनि थि दिन्थिग्रा दाजाबदा (numeral, classifiers or definitives) फोरखौ राव बिगियानारि नोजोरजों रुजुलायनानै बिजिरनानै लिरनाय जादों।
1.5 खारिथि बुथुमनाय:
बे Dissertation paper खौ आबुं महर होनायाव आं मोन्नै फुंखानिफ्रायखारिथि बुथुमनानै लानाय जादों। मोनसे फुंखाया जादों Primary Source आरो गुबुन मोनसेया जादों Secondary Source । Primary Source आव आं थाखो ख’थायाव होनाय जोंनिनो फोरोंगिरि बानेशर बर’ बिथांनि फरा फोरोंनाय आरो आंनि लोगोरफोर सुमन बर’ आरो बिमला बसुमतारि बिथांमोननिफ्रायबो खारिथि बुथुमनानै लानाय जादों। Secondary Source आव बर’ रावनि संजिरगिरि आरो बिजिरगिरि ड° फुकन चन्द्र बसुमतारि, मधुराम बर’ स्वर्ण प्रभा चैनारी, राजेन्द्र कुमार बसुमतारि, अलिन ब्रह्म, बिन्दु बसुमतारि, दुज्र्जय पाहार नार्जारि, बानेश्वर बर’ आरो असमिया रावनि संजिरगिरि आरो बिजिरगिरि Dr. Upendranath Goswami, Dr. G.C. Goswami, Dr. Ramesh Pathak, Dr. Nagen Thakur, Dr. (Mrs.) Arpana Konwar बिथांमोननि सोरजिनाय बेसेनगोसा बिजाबफोरनिफ्राय आं आंनि बे Dissertation Paper आव गोनांथि जानायखौ खारिथि बुथुमनानै लानाय जादों।